Councours di Jouine de Prouvènço
Se comton à milié li jouine Prouvençau aprenènt lou prouvençau o lou niçard, siegue à l’escolo o dins uno assouciacioun culturalo. Pèr lis encouraja, la Regioun Prouvènço-Aup-Costo d’Azur a crea un councours en 1992. Pièi, i’a quàuquis annado, l’a fisa à l’Unioun Prouvençalo. Lou vounzen Councours di Jouine de Prouvènço prepauso dos meno de participacioun : siegue escriéure e enregistra un tèste en prouvençau o en niçard, siegue, toujour en lengo nostro, coumpausa uno cansoun (paraulo e musico) e l’interpreta, o soulamen interpreta uno cansoun.
COUNCOURS DE CREACIOUN DE TÈSTE
Li councurrènt dèvon manda un disque sarra (CD) de preferènci. Uno desparticioun es facho segound l’age : " pichoun ", " grandet ", " jouvènt ". Cadun dis escaloun d’age es parteja entre lis enregistramen individuau (enregistramen de 5 minuto au bèu mai) e couleitiéu (7 mn).
La categourìo " Tèste " es duberto i jouine sachènt lou prouvençau o lou niçard.
COUNCOURS DE COUMPOUSICIOUN E D’INTERPRETACIOUN DE CANSOUN EN PROUVENÇAU O EN NIÇARD
Touto liberta d’estile es dounado i councurrènt (rap, reggae, rock, pop-rock, varieta, tradiciounau…), que podon se presenta soulet o en group. La coumpousicioun aura de coumprendre paraulo e musico. Aquéli qu’interpretaran soulamen di cansoun en prouvençau o en niçard saran classa à despart.
Forço lot recoumpensaran li laureat : cadeno hi-fi, musiquejaire pourtadou MP3, disque, libre, babiolo…
Un prèmi di " valour prouvençalo " reserva à la categourìo " jouvènt " recoumpensara li tèste que faran lou mai valé la deviso de l'Unioun Prouvençalo : la largueza (larguesso d’esperit), la convivencia (la counvivènço) ; lo paratge (l’egalita dins la qualita).
Li candidat se dèvon faire marca au plus lèu e manda sa casseto audiou o sa cansoun avans lou 5 de mai de 2007, à :
COUNCOURS DI JOUINE DE PROUVÈNÇO - Prouvènço-Prèsso - 13, rue des Cheminots - 05000 Gap - Tel/telecòpi : 04 92 56 11 84 - courriel :
prouvenco.presso@free.fr
La prouclamacioun di joio se debanara dins l’encastre de la Fèsto di Jouine de Prouvènço que se capitara aquest an à La Tourre d'Egues, dins la Vaucluso, lou dissate 2 de jun de 2007. Aquest jour de fèsto sara aviva pèr li laureat dóu councours de cansoun.
Chasque candidat reçaupra un encartamen d'ounour e forço lot recoumpensaran tóuti li councurrènt.
L’Unioun Prouvençalo prendra à sa cargo uno partido di fres de trasport pèr autoucàrri pèr la ceremòni de remesso di joio. Poudès touca pèr acò Enri Féraud au 04 90 86 60 22.
Lou reglamen es dispounible encò de Prouvènço-Prèsso.